НИЙСЛЭЛИЙН ХЭРЭГЛЭГЧИД ЭЭ!

Та бүхэнд Тулгар Төр байгуулагдсаны 2228, Их Монгол Улс байгуулагдсаны 813 жил, Ардын Хувьсгалын 98 жилийн ойн Үндэсний баяр наадмын мэндийг дэвшүүлж НИЙСЛЭЛИЙН ХЭРЭГЛЭГЧДИЙН ЭРХ АШГИЙГ ХАМГААЛАХ НИЙГЭМЛЭГ-ээс дараахь сэрэмжлүүлэгийг хүргэж байна.

Нийслэлийн хэрэглэгчийн эрх ашгийг хамгаалах нийгэмлэгийн Удирдах зөвлөлийн хурал 2019 оны долдугаар сарын 4-ний өдөр боллоо.

Тус хурлаар Нийслэлийн эрх ашгийг хамгаалах нийгэмлэгийн 2019 оны эхний хагас жилд хийж гүйцэтгэсэн ажлын тайлан, Хяналтын зөвлөлөөс НХЭАХН-ийн үйл ажиллагаанд хийсэн шалгалтын мэдээлэл, нийгэмлэгийн 2019 оны төсвийн төсөл, өнөөгийн байдал, цаашдын чиг хандлага зэргийг хэлэлцэв.

Нийслэлийн Хэрэглэгчдийн эрх ашгийг хамгаалах нийгэмлэгээс Шастины 3 дугаар Төв эмнэлгийн ёс зүйн салбар хороотой хамтран Зүрхний мэс заслын тасагт хэвтэн эмчлүүлэгчдийн дунд “Хэрэглэгчийн эрх ашгийг хамгаалах хуулийн талаар хэрэглэгчийн эрх, үүрэг, хэвтэн эмчлүүлэгч, эмчлэгч талуудын талаар сургалт зохион байгууллаа.

Сургалтаар хэвтэн эмчлүүлэгч, эмчлэгч хоёр тал харилцан хамааралтай байж, бие биеэ хүндлэн харилцсаны үндсэн дээр эмчилгээ үйлчилгээг хэрхэн авах, Хэрэглэгчийн хуулинд хэрэглэгч ямар эрхтэйгээс гадна, үүрэгтэй болох талаар тодорхой зааж, хэрэглэгчийн боловсролын талаар сургалт явууллаа.

Нийслэлийн Хэрэглэгчдийн эрх ашгийг хамгаалах нийгэмлэгийн гүйцэтгэх захирал С.Тойвгоо Монголын Үндэсний Олон Нийтийн Радиогийн “Нийгэм хүмүүс” нэвтрүүлэгт 2019 оны зургадугаар сарын 19-ний өдөр оролцож ярилцлага өглөө. 

Нийслэл Улаанбаатар хотын хэрэглэгчийн эрх ашгийг хамгаалах нийгэмлэгийн төлөөлөгчид БНХАУ-ын Өвөр Монголын Өөртөө Засах Орны Манжуур хотын Хэрэглэгчдийн эрх ашгийг хамгаалах нийгэмлэгийн удирдлагуудтай 2019 оны зургадугаар сарын 21-ний өдөр уулзлаа.